ઈમર્જન્સી હેલ્પલાઈન નંબર 112 પર ફોન કરીને આ છોકરાએ કહ્યું હતું કે, છત્રપતિ શિવાજી મહારાજ ઈન્ટરનેશનલ એરપોર્ટ પરથી 10 કલાક બાદ જે ફ્લાઈટ ઉપડવાની છે તેમાં બોમ્બ મૂકવામાં આવ્યો છે. જેથી તાત્કાલિક ધોરણે આ માહિતી પોલીસને આપવામાં આવી અને તેમણે એરપોર્ટ પર તૈનાત સુરક્ષા એજન્સીઓને સતર્ક કરી હતી. સુરક્ષા એજન્સીઓએ તપાસ શરૂ કરી અને ફોન કરનાર શખ્સની ભાળ મેળવવાની દિશામાં પણ કામ શરૂ થઈ ગયું.
તપાસના અંતે ખબર પડી કે, બોમ્બ હોવાની વાત ખોટી છે. ચાલુ વર્ષે જ પોલીસ કંટ્રોલ રૂમને બે ડઝનથી વધુ આવા ખોટા ફોન આવી ચૂક્યા છે. બીજી તરફ ફોન કરનાર શખ્સને શોધતા શોધતા પોલીસ સતારા પહોંચી ગઈ. જ્યાં પહોંચીને પોલીસને જાણ થઈ કે ફોન કરનારો શખ્સ 10 વર્ષનો પથારીવશ દિવ્યાંગ બાળક છે. પોલીસે બાળકના પેરેન્ટ્સને આ વાતની જાણ કરીને ચેતવણી આપી કે ફરીવાર આવું ના બનવું જોઈએ.
“અમારી તપાસમાં બહાર આવ્યું કે, આ બાળક ક્રાઈમ શોઝ જોવાનો શોખીન છે. તે દિવ્યાંગ છે અને પથારીવશ છે. તેણે ફોન કરવા માટે પોતાના પિતાના મોબાઈલનો ઉપયોગ કર્યો હતો”, તેમ પોલીસે જણાવ્યું. ઉલ્લેખનીય છે કે, આવા ખોટા ફોન કરવા પાછળ ડિપ્રેશન, માનસિક અસ્થિરતા, બેરોજગારી, બદલો લેવાની ભાવના કે ઈર્ષ્યા વગેરે જેવા કારણો રહેલા હોય છે. આવા કિસ્સાઓમાં જો વ્યક્તિ રીઢો ગુનેગાર હોય તો પોલીસ ગુનો નોંધે છે. જ્યારે અમુક કિસ્સામાં FIR નોંધવામાં વિલંબ થાય તો પણ પોલીસ તપાસ ચાલુ રાખે છે. આ અઠવાડિયે જ આવો એક ખોટા ફોનનો કિસ્સો બન્યો હતો જેમાં કેસ રજિસ્ટર નથી થયો પણ તપાસ ચાલુ છે.
