ડાયરેક્ટર: નિતેશ તિવારી
શ્રેણી: હિન્દી, રોમાંસ, ડ્રામા
સમય: 2 કલાક 2 મિનિટ
રેટિંગ: 3.5/5
‘દંગલ’ અને ‘છિછોરે’ જેવી અર્થપૂર્ણ ફિલ્મો બનાવતા નિર્દેશક નિતેશ તિવારીની નવી ફિલ્મ ‘બવાલ’નું ટ્રેલર આવ્યું ત્યારે મનમાં પ્રશ્ન ઉઠ્યો હતો કે, વરુણ અને જ્હાન્વીની લવસ્ટોરીને બીજા વિશ્વ યુદ્ધ સાથે જોડવામાં આવી હશે પરંતુ ફિલ્મ જોયા પછી અંદાજો આવે છે કે, નિતેશ બીજા વિશ્વ યુદ્ધના કેટલાય ભાગને ફિલ્મમાં રૂપકની જેમ વાપર્યા છે. તેની સાથે આજના જમાનાની રિલેશનશીપના તાંતણાની જટિલતાને દર્શાવી છે. આ જોડાણ પહેલા તો કારણ વિનાનો લાગશે પરંતુ વાર્તા જેમ-જેમ આગળ વધશે તેમ તે પરિસ્થિતિ અને પાત્રો સાથે સંગતતા સાધતા જશે અને દર્શકો પણ તેની સાથે જોડાશે.
ફિલ્મની વાર્તા
ફિલ્મની વાર્તા લખનૌમાં રહેતા અજ્જુ ભૈયા ઉર્ફે અજય દીક્ષિત (વરુણ ધવન)ની છે. અજ્જુ સ્કૂલમાં ઈતિહાસનો શિક્ષક છે પરંતુ તેના ગુણગાન આખા શહેરમાં ગવાય છે. લખનૌના લોકોનું કહેવું છે કે, અજ્જુ ભૈયા નાસામાં વૈજ્ઞાનિક, આર્મીમાં ઓફિસર, જિલ્લામાં કલેક્ટર અને ક્રિકેટર બનતાં એટલા માટે રહી ગયો કારણકે તે શિક્ષક બનીને બાળકોનું ભવિષ્ય ઉજ્જવળ બનાવા માગતો હતો. શહેરના આબાલવૃદ્ધ સૌ તેને સુપરમેન માને છે પરંતુ પરિવાર અને મિત્રો સિવાય કોઈ નથી જાણતું કે અજ્જુની આ છબિ દેખાડો માત્ર છે. તેણે લોકો સામે ખોટી છબિ ઊભી કરી છે. ઈતિહાસનો શિક્ષક પણ તે જુગાડ કરીને બન્યો હતો.
યુરોપ જવાનો બનાવ્યો પ્લાન
વાર્તા આગળ વધે છે તેમ ખબર પડે છે કે, ભણેલી-ગણેલી ટોપર નિશા (જ્હાન્વી કપૂર) સાથેનું તેનું લગ્નજીવન મુશ્કેલ સમયમાંથી પસાર થઈ રહ્યું છે. હકીકતે નિશાને બાળપણથી ખેંચની તકલીફ હતી. આ જાણ્યા છતાં પોતાની ઈમેજ સારી રાખવા માટે તે નિશા સાથે લગ્ન કરે છે. પરંતુ લગ્નના દિવસે જ નિશાને ખેંચ આવે છે ત્યારે અજ્જુ ડરી જાય છે કે, કદી જાહેરમાં નિશાને ખેંચ આવશે તો તેની પબ્લિક ઈમેજ ખરાબ થઈ જશે. આ જ કારણે તે નિશાની અવગણના કરવા લાગે છે પરંતુ વાર્તામાં ટ્વિસ્ટ ત્યારે આવે છે જ્યારે ધારાસભ્યના દીકરાને થપ્પડ મારવાના લીધે અજ્જુને સ્કૂલમાંથી એક મહિના માટે સસ્પેન્ડ કરી દેવામાં આવે છે. આ વિકટ સ્થિતિમાં પોતાની બગડતી ઈમેજ બચાવવા તે એક જુગાડ કરે છે. તે પોતાના મમ્મી-પપ્પા પાસેથી રૂપિયા લઈને યુરોપ જવાનો પ્લાન બનાવે છે. તે સ્કૂલવાળાને કહે છે કે, યુરોપ જઈને તે વિદ્યાર્થીઓને બીજા વિશ્વયુદ્ધની જગ્યાઓ અને ઘટનાઓની જાણકારી વિના મૂલ્યે લાઈવ આપશે.
અંદર પણ ચાલે છે યુદ્ધ
મજબૂરીમાં ટ્રીપ પર તેને નિશાને પણ સાથે લઈ જવી પડે છે. યુરોપ જઈને તેને અહેસાસ થાય છે કે, તેની અંદર પણ એક યુદ્ધ ચાલી રહ્યું છે. આ ટ્રીપ પછી અજ્જુ પોતાની નોકરી બચાવી શકશે? પત્ની નિશા સાથેના બગડતા સંબંધો કેવું રૂપ લેશે? શું તે પોતાની ખોટી છબિના આવરણને તોડી શકશે? આ બધું જાણવા માટે ફિલ્મ જોવી જ રહી.
રિવ્યૂ
ડાયરેક્શનની વાત કરીએ તો, ફિલ્મનો ફર્સ્ટ હાફ મજેદાર અને હળવી કોમેડી સાથે રજૂ કરવામાં આવ્યો છે. જોકે, નિર્દેશકે ફિલ્મ અને પાત્રને સ્થાપિત કરવામાં વધુ સમય વેડફ્યો છે અને એટલે જ ફિલ્મ થોડી ધીમી લાગે છે. ઈન્ટરવલ પછી ફિલ્મ પોતાના ઉદ્દેશ પર આવે છે. અહીં જ નિતેશ ફિલ્મને અલગ ટ્રીટમેન્ટ આપે છે. દ્વિતિય વિશ્વ યુદ્ધના બેકડ્રોપ પર લવસ્ટોરીને વણવી કપરું કામ હતું પરંતુ નિતેશ તિવારીએ અશ્વિની ઐય્યર તિવારી, પિયૂષ ગુપ્તા, નિખિલ મહેરોત્રા અને શ્રેય જૈન જેવા લેખકોની ટીમ સાથે મળીને તેને સરસ રીતે પડદા પર ઉતારી છે. ફિલ્મના ડાયલોગ્સ પણ સારા છે. ક્લાઈમેક્સ પર પહોંચતા સુધીમાં તો ફિલ્મ સારો મેસેજ આપવાની સાથે ફીલગુડ ફેક્ટર પણ આપે છે. ફિલ્મનું એડિટિંગ થોડું વધારે ટાઈટ કરવામાં આવ્યું હોત તો વધુ મજા પડત. સિનેમેટોગ્રાફર મિતેશ મીરચંદાનીએ લખનૌ અને યુરોપને દર્શાવવાનું પોતાનું કૌશલ્ય બતાવ્યું છે. ડેનિયલ બી જ્યોર્જનું બેકગ્રાઉન્ડ મ્યૂઝિક વર્લ્ડ વૉર 2ના દ્રશ્યોમાં પ્રાણ રેડે છે. મિથુન, તનિષ્ક બાગચી અને આકાશદીપ સેનગુપ્તાની ત્રિપુટી મ્યૂઝિક મામલે ખાસ કમાલ ના કરી શકી.
અભિનય
હીરો નંબર 1, જુગ જુગ જિયો જેવી ફિલ્મોમાં ક્યૂટ અને ચંચળ પાત્રો ભજવતો વરુણ બદલાપુર, સૂઈ ધાગા અને ઓક્ટોબર જેવી ફિલ્મોમાં પોતાનો દમદાર અભિનય બતાવી ચૂક્યો છે. આ વખતે પડદા પર તે જટિલ ભૂમિકા ભજવતો જોવા મળ્યો છે. તેનો રોલ નેગેટિવ થઈ જાત પરંતુ તેણે સ્વાર્થી, જુગાડુ અને સ્વકેન્દ્રી અજ્જુના પાત્રને ઈમાનદારીથી ભજવ્યું છે. વરુણ-જ્હાન્વીની ઓન-સ્ક્રીન કેમેસ્ટ્રી સારી લાગે છે. સીધી-સાદી સ્મોલ ટાઉન ગર્લની ભૂમિકામાં જ્હાન્વી સારી લાગે છે. પિતાની ભૂમિકામાં મનોજ પાહવાએ પાત્રને ન્યાય આપ્યો છે. માની ભૂમિકામાં અંજુમન સક્સેના પણ જામે છે. બાળ કલાકારોએ પણ ફિલ્મમાં સારું કામ કર્યું છે.
કેમ જોવી?
મેસેજવાળી પ્રેમ કહાણીના શોખીનો આ ફિલ્મ જોઈ શકે છે.
