ડાયરેક્ટર: પીયૂષ ગુપ્તા
શ્રેણી: હિન્દી, બાયોપિક, ડ્રામા
સમય: 2 કલાક 7 મિનિટ
રેટિંગ: 3.5/5
‘બેટા પહેલા લગ્ન કરી લે પછી જે કરવું હોય તે કરજે’. આપણા સમાજમાં હંમેશાથી દીકરીઓને આ રીતે જ સપના દેખાડવામાં આવે છે. જાણીતાં શેફ અને કૂકબુક રાઈટર તરલા દલાલે પણ આજથી લગભગ પાંચ દશકા પહેલા કંઈક કરી બતાવવાનું સપનું સેવ્યું હતું. આ સંઘર્ષમાં તેમને પતિનો સાથ મળ્યો હતો. ફિલ્મમાં એક ડાયલોગ પણ છે જેમાં તરલાના પતિનો બોસ તેને રહે છે કે, “કહેવાય છે કે, દરેક સફળ પુરુષ પાછળ એક સ્ત્રીનો હાથ હોય છે પરંતુ સફળ થવા માટે સ્ત્રીઓને પુરુષોના ખભા નથી મળતા.”
વાર્તા
ફિલ્મની વાર્તા સેલિબ્રિટી શેફ તરલા દલાલની જિંદગી પર આધારિત છે. તરલા યુવાન વયના હતા ત્યારથી જ કંઈક કરવા માગતા હતા. તેઓ કહેતા કે, ‘મારે કંઈક કરવું છે પરંતુ શું તે સમજાતું નથી’. તરલાએ લગ્ન વખતે પતિ પાસેથી વચન લીધું હતું કે, જ્યારે તેને સમજાઈ જશે કે તે શું કરવા માગે છે ત્યારે તેઓ તેને તે કરવા દેશે.લગ્ન પછી ગૃહસ્થ જિંદગી અને બાળકોને સંભાળવામાં તરલાના જીવનનો એક દશકો વીતી જાય છે. શરૂઆતથી ખાવાનું બનાવવામાં એક્સપર્ટ તરલાએ એકવાર પાડોશીની દીકરીને લગ્ન પહેલા સ્વાદિષ્ટ ભોજન બનાવવાનું શીખવ્યું. જે બાદ તો લગ્ન પહેલા રાંધવાનું શીખવા માગતી છોકરીઓની લાઈન લાગી ગઈ. પોતાની પાક કળાને લોકો સુધી પહોંચાડવા માટે તરલાએ કૂક બુક લખી અને જમવાનું શીખવવાના શોઝ પણ કર્યા. આ દરમિયાન કેટલીય મુશ્કેલીઓ પણ આવી પરંતુ તરલા હિંમત ના હારી. તેમનું પદ્મશ્રીથી પણ સન્માન થયું હતું.
રિવ્યૂ
‘દંગલ’ અને ‘છિછોરે’ જેવી સુપરહિટ ફિલ્મોમાં નિતેશ તિવારીના સહાયક લેખક રહેલા પીયૂષ ગુપ્તાએ તરલા દલાલની જિંદગીને ખૂબસૂરતી સાથે પડદા પર ઉતારી છે સાથે જ તેમના સંઘર્ષોને પણ પ્રેરણાદાયક રીતે રજૂ કર્યા છે. ફિલ્મમાં તરલાના આધારે તેમણે સ્ત્રી સશક્તિકરણનો ઉપદેશ પણ આપ્યો છે. ફિલ્મની વાર્તા અને સ્ક્રીનપ્લે તમને કંટાળવા નહીં દે. એકવાર ફિલ્મ જોવાનું શરૂ કરશો તો સીધા પાંચ દાયકા પહેલાના સમયમાં પહોંચી જશો. પીયૂષે તરલાની જિંદગીના 20થી50 વર્ષના સમયને મસાલેદાર રેસિપીની જેમ પીરસ્યા છે. તેમણે એવી એક વ્યક્તિની બાયોપિક બનાવવાનું બીડું ઝડપ્યું જે હાલ આ દુનિયામાં નથી રહ્યા અને તેમાં તેઓ સફળ રહ્યા છે.
એક્ટિંગ
વેબ સીરીઝ ‘મહારાની’માં પોતાની એક્ટિંગનો દમ દેખાડી ચૂકેલી હુમા કુરેશી ફિલ્મ નિર્માતાના ભરોસા પર ખરી ઉતરી છે. ફિલ્મમાં ઉત્તમ એક્ટિંગ કરીને તેણે સાબિત કરી દીધું છે કે, મહિલા પ્રધાન ફિલ્મો કરી શકતી અભિનેત્રીઓમાં તેનું નામ સામેલ કરી શકાય. શારિબ હાશમીએ પણ ફિલ્મમાં સારો અભિનય કર્યો છે. બાકીના કલાકારોએ પણ પોતાના પાત્ર સાથે ન્યાય કર્યો છે.
Kareena Kapoor: ઈટાલીમાં પરિવાર સાથે હોલિડે પર કરીના કપૂર, વિદેશ ફ્રેન્ડ્સ સાથે બીચ પર લીધું લંચ
કેમ જોવી?
જો તમે આ વીકએન્ડ પર કોઈ પ્રેરણાદાયક અને સુંદર ફિલ્મ જોવા માગતા હો તો આખા પરિવાર સાથે ઘરે બેસીને ઓટીટી પર ‘તરલા’ જોઈ શકો છો.
