ડાયરેક્ટર: રાજ શાંડિલ્ય
શ્રેણી: હિન્દી, ડ્રામા, કોમેડી, રોમાન્સ
સમય: 2 કલાક 13 મિનિટ
રેટિંગ: 2.5/5
આયુષ્માન ખુરાના એવા કલાકારો પૈકીનો એક છે જે પોતાના પાત્રમાં ઘૂસી જાય છે અને તેને જીવંત કરે છે. ‘આર્ટિકલ 15’ હોય કે ‘ડૉક્ટર જી’ દરેક પાત્રને આયુષ્માન જીવ્યો છે. 2019માં આવેલી ફિલ્મ ‘ડ્રીમ ગર્લ’માં તેણે ફોન પર છોકરીનો અવાજ કાઢીને પુરૂષોને રિઝવ્યા હતા. હવે ‘ડ્રીમ ગર્લ 2’માં તે સાક્ષાત પૂજાનું રૂપ ધારણ કરીને આવ્યો છે. આ કોન્સેપ્ટ અસલ જિંદગીમાં ગળે ઉતરે એવો નથી પરંતુ આયુષ્માને પડદા પર જે લટકા-ઝટકા અને નખરા સાથે તેને ભજવ્યો છે તે પ્રશંસાને પાત્ર છે.
વાર્તા
ફિલ્મની વાર્તાની શરૂઆત થાય છે કરમ (આયુષ્માન ખુરાના)થી, જે પાર્ટ વનમાં રામલીલામાં અભિનય કરતો હતો પરંતુ હવે તે માતાજીના જાગરણમાં ભજનો ગાય છે. તે અને તેના પિતા જગજીત (અન્નુ કપૂર) હજી પણ દેવામાં ડૂબેલા છે. કરમ પરી (અનન્યા પાંડે)ના પ્રેમમાં છે. પ્રેમનો વિલન પરીના પિતા (મનોજ જોષી) છે. તેમની શરત છે કે, કરમના બેંક ખાતામાં 25 લાખ રૂપિયાનું બેલેન્સ, પોતાનું ઘર અને પાકી નોકરી ના શોધી ત્યાં સુધી તે પરીના લગ્ન નહીં કરાવે. કરમનો મિત્ર સ્માઈલી (મનજોત સિંહ) અને તેના પિતા જગજીત તેને સોનાભાઈ (વિજય રાઝ)ના ડાન્સિંગ બારમાં છોકરી બનીને રૂપિયા કમાવવાની તરકીબ અજમાવવા માટે રાજી કરે છે. પરંતુ રૂપિયાની તંગીનો અંત નથી આવતો અને તેના ચક્કરમાં કરમને પૂજા બનીને અબુ સલીમ (પરેશ રાવલ)ના દીકરા શાહરૂખ (અભિષેક બેનર્જી) સાથે લગ્ન કરવા પડે છે. અબુ સલીમના ઘરમાં તેનો સાવકો દીકરો શૌકિયા (રાજપાલ યાદવ) પણ રહે છે, જે પૂજાના પ્રેમમાં પડી જાય છે. અબુ સલીમની રંગીન મિજાજની બહેન જુમાની (સીમા પાહવા) કરમ સાથે લગ્ન કરવા માગે છે. જુમાનીએ સોનાભાઈ સાથે લગ્ન કર્યા હોય છે પરંતુ સોનાભાઈ તો પૂજા પર લટ્ટુ છે. આ પાત્રો વચ્ચે પૂજા અને કરમને લઈને ગૂંચવણ પેદા થાય છે, જે ખૂબ હસાવશે. કરમ પૂજાની હકીકત ક્યાં સુધી છુપાવી રાખશે? રૂપિયાનો જુગાડ કરીને તે લગ્ન કરવામાં સફળ થશે? આ પ્રશ્નોના જવાબ મેળવવા માટે તમારે ફિલ્મ જોવી પડશે.
રિવ્યૂ
નિર્દેશક રાજ શાંડિલ્ય સમય વેડફ્યા વિના મૂળ વાર્તા પર આવી ગયા છે. કરમ પૂજા બનીને ચાર-ચાર પુરુષોને પોતાની પાછળ લટ્ટુ કરી દે છે એ વાત પચાવવી જરા મુશ્કેલ લાગે છે. જોકે, હાસ્ય અને મનોરંજક પરિસ્થિતિમાં તમે તર્ક પર વધુ ધ્યાન આપ્યા વિના એન્ટરટેન થઈ જાવ છો. ફિલ્મમાં અન્નુ કપૂર, અસરાની, પરેશ રાવલ, વિજય રાજ, સીમા પાહવા, રાજપાલ યાદવ જેવા હાસ્યકલાકારોની ભરમાર છે. જોકે, ક્યાંક ક્યાંક આ પાત્રોના વિના કારણના ટ્રેક નાખ્યા હોય એવું લાગે છે. જેના લીધે વાર્તા લાંબી લાગે છે. વાર્તામાં ઉતાર-ચઢાવની કમી લાગે છે. ક્લાઈમેક્સ પણ થોડો લાંબો લાગે છે. વન લાઈનર દ્વારા હાસ્ય પેદા કરવાનો પ્રયાસ થયો છે પરંતુ કેટલાક સંવાદ બાલિશ લાગે છે. સંગીતની વાત કરીએ તો, મીટ બ્રધર્સનું ગીત ટેલિફોન 2.0 ગીત સારું છે પણ બાકીના ગીતો પ્રભાવિત નથી કરતા.
એક્ટિંગ
આયુષ્માન ખુરાનાએ બધી રીતે દિલ જીતવવાળું પર્ફોર્મન્સ આપ્યું છે. કરમ અને પૂજા વચ્ચેની તેની અદલાબદલી રસપ્રદ છે. પૂજાના પાત્રમાં ઢળવા તેણે કરેલી મહેનત કદકાઠીની સાથે અદાઓ અને ડાન્સમાં પણ છલકે છે. અનન્યા પાંડેને ફિલ્મમાં ખાસ તક આપવામાં નથી આવી પરંતુ અન્ય સહકલાકારોની મદદથી અભિનયનો પક્ષ મજબૂત થયો છે. નાના પાત્રમાં પણ અસરાની ખૂબ હસાવે છે. અન્નુ કપૂર પણ પોતાની શૈલીમાં મનોરંજન પીરસે છે. વિજય રાજ અને રાજપાલ યાદવ કોમેડીનો સ્વાદ પીરસે છે. સીમા પાહવાએ પણ પાત્રને ન્યાય આપ્યો છે. મનજોત અને અભિષેક બેનર્જીએ પણ સાથ આપ્યો છે.
કેમ જોવી?
હાસ્ય અને કોમેડી ફિલ્મના શોખીનો જોઈ શકે છે.
