ડાયરેક્ટર: અનિલ શર્મા
શ્રેણી: હિન્દી, એક્શન, ડ્રામા
સમય: 2 કલાક 50 મિનિટ
રેટિંગ: 3.5/5
સની દેઓલ અને અમિષા પટેલની ફિલ્મ ‘ગદર’ રિલીઝ થયાના 22 વર્ષ બાદ સીક્વલ આવી છે. ફિલ્મના એક સીનમાં પાકિસ્તાની જનરલ તારા સિંહના દીકરાને કેદ કરીને તેને પડકાર આપે છે. જે બાદ ‘ગદર’માં હેન્ડપંપ ઉખાડનારો તારા સિંહ આ વખતે ઘણું બધું એક પછી એક ઉખાડી નાખે છે. ‘ગદર: એક પ્રેમ કથા’ની સીક્વલ ફિલ્મ ‘ગદર 2: ધ કથા કન્ટીન્યૂઝ’ની રિલીઝ પહેલા દર્શકોમાં તેનો જબરદસ્ત ક્રેઝ હતો અને પહેલા દિવસે જ 3 લાખથી વધુ એડવાન્લ બુકિંગ થયું હતું.
વાર્તા
‘ગદર’ની વાર્તા 1947ના ભારત-પાકિસ્તાનના વિભાજનની પૃષ્ઠભૂમિ પર આધારિત હતી. જ્યારે ‘ગદર 2’ની વાર્તા 1971માં ભારત-પાકિસ્તાનનું યુદ્ધ શરૂ થયું એ પહેલાની છે. ગત ફિલ્મમાં તારા સિંહ મુસીબતોનો સામનો કરીને પત્ની સકીનાને પાકિસ્તાનથી પાછી લાવ્યો હતો. ‘ગદર 2’ની વાર્તાની વાત કરીએ તો, તારા સિંહ (સની દેઓલ) અને સકીના (અમિષા પટેલ) ભારત પાછા આવીને ખુશીથી જિંદગી વિતાવી રહ્યા હોય છે. તેમનો દીકરો ચરણજીત ઉર્ફે જીતે (ઉત્કર્ષ શર્મા) હવે મોટો થઈ ગયો છે. આ તરફ પાકિસ્તાનમાં મેજર જનરલ હામિદ ઈકબાલ (મનીષ વાધવા) બદલાની આગમાં સળગી રહ્યો છે કારણકે તારા સિંહ તેની રેજીમેન્ટના 40 જવાનોને મારીને સકીનાને ભારત લઈ ગયો હતો. હામિદે સકીનાના પિતા અશરફ અલી (અમરીષ પુરી)ને તો ફાંસીની સજા કરી હતી પણ હવે તે તારા સિંહ સાથે બદલો લેવા માગે છે. એક દિવસ હામિદને પોતાની ઈચ્છા પૂરી કરવાની તક મળી જાય છે. એક ગેરસમજણના લીધે તારા સિંહનો દીકરો પાકિસ્તાન પહોંચી જાય છે અને તેની ગિરફ્તમાં આવી જાય છે. પોતાના દીકરાને છોડાવા ફરી એકવાર તારા સિંહ પાકિસ્તાન જવાનો નિર્ણય કરે છે. પરંતુ શું તે સફળ થશે? આ જાણવા માટે તમારે થિયેટર સુધી જવું પડશે.
રિવ્યૂ
ફિલ્મની શરૂઆત નાના પાટેકરના અવાજ અને ગત ફિલ્મના પસંદગીના ફૂટેજ સાથે થાય છે. ફિલ્મનો ફર્સ્ટ હાફ થોડો સ્લો છે અને જબરદસ્તી ખેંચ્યો હોય તેમ લાગે છે.તેની લંબાઈ થોડી ઘટાડી શકાઈ હોત. પરંતુ ઈન્ટરવલ બાદ ફિલ્મની વાર્તામાં જોરદાર ટ્વિસ્ટ આવે છે અને સેકંડ હાફમાં વાર્તા ઝડપથી આગળ વધે છે. સની દેઓલ એક્શન ફોર્મમાં નજરે પડે છે. ક્લાઈમેક્સ પણ જોરદાર છે. ડાયરેક્ટર અનિલ શર્માએ ‘ગદર 2’માં ‘ગદર’ની યાદોને સુંદરતાથી રજૂ કરી છે. તેમણે ફિલ્મમાં એક્શન, ઈમોશન અને દેશભક્તિનો રંગ ભર્યો છે. કેટલીક જગ્યાએ મારધાડવાળા સીનમાં લોજિક સમજ નહીં આવે પરંતુ દર્શકો સીટી અને તાળી વગાડતા થાકશે નહીં.
અભિનય
તારા સિંહના રોલમાં સની દેઓલ જોરદાર લાગે છે. સકીનાના રોલમાં અમિષા પટેલે પણ સારી એક્ટિંગ કરી છે. મેજર જનરલના રોલમાં મનીષ વાધવાએ જોરદાર અભિનય કર્યો છે. એક્ટિંગ મામલે ઉત્કર્ષ અને સિમરન બંનેને મહેનત કરવાની જરૂર છે. ‘ગદર’ના ગીતો ઉડ જા કાલે કાંવા અને મેં નિકલા ગડ્ડી લેકે નવી ફિલ્મમાં પણ હિટ છે.
‘ગદર 3’ પણ આવશે
ફિલ્મના અંતે સીક્વલની પણ સીક્વલની જાહેરાત કરવામાં આવી છે. એટલે ‘ગદર 3’ માટે તમારે વધુ રાહ નહીં જોવી પડે.
કેમ જોવી?
જો તમને દેશભક્તિની ફિલ્મો જોવી ગમતી હોય તો આ વીકએન્ડ પર થિયેટરમાં પહોંચી જજો. આ ફિલ્મ તમે પોતાના આખા પરિવાર સાથે જોઈ શકો છો.
