લખનૌ એરપોર્ટ પરથી મળેલી માહિતી અનુસાર, 13 ઓગસ્ટે કસ્ટમ વિભાગે એક મુસાફર પાસેથી સોનાના 14 બિસ્કિટ રિકવર કર્યા હતા. તેનું વજન 1.632 કિગ્રા હોવાનું કહેવાય છે. જે મુસાફર પાસેથી આટલી મોટી માત્રામાં સોનું મળી આવ્યું છે તે ફ્લાઇટ નંબર IX-194 દ્વારા દુબઈથી લખનૌ એરપોર્ટ પહોંચ્યો હતો.
કસ્ટમ વિભાગના અધિકારીઓને ખબર ના પડે તે માટે આ મુસાફર ઘોડા (Metal Horse Artefact)ના નાનકડા પૂતળામાં અંદરની તરફ સંતાડીને સોનું લાવી રહ્યો હતો. ચેકિંગ દરમિયાન કસ્ટમ વિભાગના અધિકારીઓએ આરોપીઓની યોજનાને નિષ્ફળ બનાવી દીધી હતી. આ જપ્ત કરાયેલા સોનાની કિંમત 98.74 લાખ રૂપિયા હોવાનું કહેવાય છે.
થોડા દિવસો પહેલા પણ લખનૌ કસ્ટમ વિભાગે 5 મુસાફરો પાસેથી 4.09 કિલોગ્રામ સોનું જપ્ત કર્યું હતું. તેની કિંમત 2 કરોડ 49 લાખ રૂપિયા હોવાનું કહેવાય છે. બીજી તરફ જેમની પાસેથી આટલી મોટી સંખ્યામાં સોનું જપ્ત કરવામાં આવ્યું હતું તે તમામ મુસાફરો દુબઈની અલગ-અલગ ફ્લાઈટ દ્વારા લખનૌ એરપોર્ટ પહોંચ્યા હતા. તેમાંથી એક પેસેન્જર ફ્લાઇટ નંબર (FZ-443) દ્વારા લખનૌ આવ્યો હતો, જ્યારે બાકીના 4 મુસાફરો ફ્લાઇટ નંબર (IX-194) દ્વારા લખનૌના ચૌધરી ચરણ સિંહ ઇન્ટરનેશનલ એરપોર્ટ પર પહોંચ્યા હતા. પકડાયેલા તમામ મુસાફરો સોનાને પેસ્ટમાં કન્વર્ટ કરીને પોતાના અન્ડરગાર્મેન્ટ્સમાં છુપાવીને લાવી રહ્યા હતા.
