એરફોર્સ વન અને બેકઅપ પ્લેનની વિશેષતાઓ
ખાસ વાત એ છે કે રાષ્ટ્રપતિ બન્યા બાદ બાઈડનની આ પ્રથમ ભારત મુલાકાત છે. આ પ્રવાસમાં તેઓ G20 કોન્ફરન્સમાં ભાગ લેવા ઉપરાંત વડાપ્રધાન નરેન્દ્ર મોદી સાથે દ્વિપક્ષીય વાતચીત પણ કરશે. માનવામાં આવે છે કે આ વાતચીતમાં ભારત અને અમેરિકા વચ્ચે વધી રહેલા સહયોગને વધુ વિસ્તારવામાં આવશે. આ સાથે કેટલાક મહત્વના સોદાઓ પણ થઈ શકે છે. બાઈડન એરફોર્સ વન એરક્રાફ્ટ દ્વારા દિલ્હી પહોંચશે. એરફોર્સ વનની સાથે સાથે બીજું એરક્રાફ્ટ બેકઅપ પ્લેન પણ હશે, જેનો ઉપયોગ ઈમરજન્સીની સ્થિતિમાં થઈ શકશે. બેકઅપ પ્લેન ગુપ્ત જગ્યાએ રાખવામાં આવ્યું છે. સ્પેશિયલ એરફોર્સ વનને મિની પેન્ટાગોન તરીકે પણ ઓળખવામાં આવે છે, જેમાં તમામ સુરક્ષા ઉપકરણો લગાવવામાં આવ્યા છે. એરફોર્સ વન એરક્રાફ્ટ તમામ પ્રકારના હુમલાને ટાળવા માટે સક્ષમ છે.
બીસ્ટમાં શું છે ખાસ?
દિલ્હીમાં લેન્ડ થયા બાદ અમેરિકન રાષ્ટ્ર પ્રમુખ બાયડન તેમના બીસ્ટ વાહનમાં મુસાફરી કરશે અને લગભગ 50 વાહનોની સુરક્ષા કોર્ડન સાથે હશે. બીસ્ટ કાર વિશે એવું માનવામાં આવે છે કે તે પરમાણુ હુમલાને પણ નિષ્ફળ બનાવવાની ક્ષમતા ધરાવે છે. રાસાયણિક અને પરમાણુ હુમલા પણ તેના પર બિનઅસરકારક છે. કારમાં 8 ઈંચ જાડા દરવાજા, પેનિક બટન, અલગ ઓક્સિજન સપ્લાય, કારમાં રાષ્ટ્ર પ્રમુખનું મેચિંગ લોહી, સેટેલાઈટ ફોન છે, જે પેન્ટાગોન સાથે હંમેશા જોડાયેલ છે. ધ બીસ્ટના ટાયરમાં ખાસ સ્ટીલ રિમ હોય છે. તેના ટાયર પંચર થતા નથી. બળતણ ટાંકીમાં સ્પેશિયલ ફોમ હોય છે. અમેરિકી રાષ્ટ્ર પ્રમુખના કાફલામાં 50 સુરક્ષા વાહનો હશે. અમેરિકાની ગુપ્તચર અને સુરક્ષા સર્વિસ ફેડરલ બ્યુરો ઓફ ઈન્વેસ્ટિગેશન એટલે કે FBI તેમજ વિદેશી ગુપ્તચર સર્વિસ સેન્ટ્રલ ઈન્ટેલિજન્સ એજન્સી એટલે કે CIA કમાન્ડો સુરક્ષામાં તૈનાત રહેશે.
ITC મૌર્ય શેરેટોન દ્વારા વ્યવસ્થા
એવું માનવામાં આવે છે કે બાઈડન દિલ્હીમાં ITC મૌર્ય શેરેટોનમાં રોકાશે. બાઈડનનો સ્યુટ હોટલના 14મા માળે છે. આ સ્યૂટ 4,600 ચોરસ ફૂટમાં ફેલાયેલો છે. આ સ્યુટનું ભાડુ 8થી 10 લાખ રૂપિયા પ્રતિ દિવસ છે. ડોગ સ્કવોડની સાથે ખાસ સાધનો પણ તૈનાત કરવામાં આવ્યા છે. દરેક ફ્લોર પર સિક્રેટ સર્વિસ કમાન્ડો તૈનાત રહેશે. બાઈડનની ટીમ માટે હોટલના 400 રૂમ બુક કરવામાં આવ્યા છે. આ સાથે હોટલમાં બાયડનની અવરજવર માટે નવી સ્પેશિયલ લિફ્ટ પણ લગાવવામાં આવી છે.
