આ અકસ્માત 22 ઓગસ્ટે થયો હતો. અકસ્માતના ઘટના સ્થળ પરના વિઝ્યુઅલ્સમાં રોલ્સ રોયસ ફેન્ટમનો ડાબી બાજુનો થોડો ભાગ જોવા મળે છે. એક વિડિયોમાં જોવા મળે છે કે કારના એન્જિનમાં આગ લાગી ગઈ હતી. કારનો આગળના આગળના ભાગનો કચ્ચરઘાણ વળી ગયો હતો અને તેનો કાટમાળ આજુબાજુ વિખરાયેલો હતો. કારના દરવાજા ખુલી ગયા હતા જેમાં અંદરનું ઓરેન્જ કલરનું ઈન્ટિરિયર જોવા મળે છે.
એક સ્થાનિકે જણાવ્યું હતું કે, અમને જ્યારે અકસ્માતની જાણ થઈ ત્યારે અમે પાંચથી છ મિનિટની અંદર જ દુર્ઘટના સ્થળે પહોંચી ગયા હતા. જોકે, ત્યારે ટેન્કરમાં આગ લાગી ગઈ હતી અને ત્યારે કારની અંદર કોઈ જ ન હતું. પોલીસે અગાઉ આની પુષ્ટિ કરી હતી કે રોલ્સ રોયસના પાંચ મુસાફરોને ઝડપથી ત્યાંથી લઈ જવામાં આવ્યા હતા. કદાચ તેમના સંબંધીઓ પાછળ અન્ય કારમાં આવી રહ્યા હોય તેઓ તેમને લઈ ગયા હોઈ શકે છે.
નજરે જોનારા એક વ્યક્તિના જણાવ્યા પ્રમાણે કદાચ પાંચથી સાત કે પછી આઠ કારનું એક ગ્રુપ હતો. આ તમામ કાર સુપર કાર હતી. તેમની આગળ અને પાછળની બાજુ એક એસ્કોર્ટ કાર પણ હતી. તેમણે લોકોને કારની બહાર કાઢ્યા હતા અને અન્ય કારમાં બેસાડીને તેમને લઈ ગયા હતા. એક વ્યક્તિએ આ અકસ્માત કેવી રીતે થયો તેને રિક્રિયેટ કરવાનો પ્રયાસ કરતા ટેન્કર જે લેનમાંથી આવી રહી હતી તે તરફ આંગળી ચીંધીને કહ્યું હતું કે, ટેન્કર તે લેનમાંથી આવી રહી. તે ત્યાંથી યુ-ટર્ન લેવા માટે ઊભી રહી હતી. જ્યારે રોડ એકમદ ક્લીયર થયો ત્યારે ટેન્કરે ટર્ન લીધો હતો પરંતુ કાર એટલી બધી સ્પીડમાં હતી કે તેના પર કાબૂ થઈ શક્યો ન હતો. કંટ્રોલ રૂમના રેકોર્ડ પ્રમાણે કારની સ્પીડ 230 કિમી પ્રતિ કલાક હતી.
એક મીડિયા ચેનલ સાથેની વાતચીતમાં એક વ્યક્તિએ નિરાશા વ્યક્ત કરતા કહ્યું હતું કે ટેન્કર ડ્રાઈવરને અકસ્માત માટે જવાબદાર ગણવો નિરાશાજનક બાબત છે. તેઓ ગરીબ લોકો છે અને પોતાનું જીવન ચલાવવા માટે કામ કરી રહ્યા છે. પરંતુ સ્ટન્ટ ડાઈવર્સે રેસ લગાવી હતી અને અકસ્માત સર્જ્યો હતો.
નૂહ પોલીસે જણાવ્યું હતું કે, જે લોકો ટેન્કરમાં હતા તેઓ નિયમિત રીતે આ રૂટ પર આવતા હતા અને બંને વ્હીકલ્સ દિલ્હીથી આવી રહ્યા હતા ત્યારે આ ઘટના બની હતી. નજરે જોનારાઓનું કહેવું છે કે કાર અત્યંત સ્પીડમાં હતી અને તેના કારણે અકસ્માત સર્જાયો હતો. જોકે, હાલમાં અમે આની પુષ્ટી કરી શકીએ નહીં. આ ઉપરાંત સ્પીડ કેટલી હતી તે પણ અત્યારે અમે કહીને ખાતરીપૂર્વક કહી શકીએ નહીં. હાલમાં તપાસ ચાલી રહી છે.
